կրթության հավասարության
դեսպաններ

ԱՌԱՋՆՈՐԴՈՒԹՅԱՆ ՈՒՂԻՆԵՐ

2021 թվականի դրությամբ մեր շրջանավարտների 80%-ը շարունակում է աշխատել կրթության ոլորտում` որպես ուսուցիչներ, դպրոցի տնօրեններ, կրթության կառավարիչներ, այլ հարակից ոլորտների մասնագետներ։

HIGHLIGHTS

ԱՆՈՒՇԻԿ ՄԵԼՔՈՆՅԱՆ

Մինչ «Դասավանդի'ր, Հայաստան»-ին  դիմելը դասավանդում էի « Smart Start International Preschool of Armenia»-ում` որպես բնագիտության և արվեստի ուսուցչուհի։ Երկամյա ծրագրի շրջանակում դասավանդել եմ քիմիա և կենսաբանություն առարկաները Արագածոտն մարզի Լեռնարոտ համայնքում։ 

«Դասավանդի՛ր, Հայաստան»-ի  շնորհիվ ունեցա անմոռանալի փորձառություն, որը շատ կարևոր հետք թողեց իմ՝ որպես անհատ զարգացման, նոր հատկանիշների  ձեռքբերման և որպես մասնագետ ավելի կայանալու գործում։ Ծրագրի ավարտից հետո մասնակցել եմ «Քայլ դեպի տուն» ծրագրին մյուս հիասքանչ շրջանավարտների հետ, որն աննկարագրելի փորձառություն էր սփյուռքահայ պատանիների հետ։ 2018թ.-ին հիմնադրեցի “Green Construction” ընկերությունը, որը զբաղվում է ներքին և արտաքին կանաչապատումով։ Հիմնական շեշտադրումը սկանդինավյան երկրներից ներմուծված մամուռն է, որն առանց խնամքի ապրում է շուրջ 10 տարի։ Ի դեպ, իմ առաջին պատվիրատուներից էր նաև «Դասավանդի՛ր, Հայաստան»-ը։

ՔՆԱՐԱ ՏԵՐ-ՀՈՎՀԱՆՆԻՍՅԱՆ

Մինչ «Դասավանդի’ր, Հայաստան» ծրագրին դիմելը  Քնարան  սովորել է Հայ-ռուսական «Սլավոնական» պետական համալսարանի սոցմշակութային սերվիս և տուրիզմ բաժնում։ Ավարտելուց հետո  աշխատել է «Ժողովրդական Արվեստի Հանգույց» կրթամշակութային հիմնադրամում` որպես հնաոճ գորգերի և կարպետների ռեստավրատոր։ Ծրագրիի շրջանակներում դասավանդել է ռուսաց լեզու և գրականություն Լոռու Մարզի Կողես գյուղում։

«Կյանքը գյուղում օգնեց ինձ բացահայտել սեփական ներուժս, չվախենալ դժվարություններից, սովորել գնահատել և սիրել ինձ շրջապատող ամեն ինչ: «Արվեստ»  խմբակի միջոցով աշակերտներս բացահայտեցին հայ անվանի նկարիչների գործերը և կենսագրության հետաքրքիր դրվագները, մասնակցեցին «Մինասի գույներ»  կրթական աշխատարանին Ազգային պատկերասրահում»,- պատմում է Քնարան»։

Ծրագիրն ավարտելուց հետո Քնարան աշխատել է Շիրակացու ճեմարանում, ԿՏԱԿ -ի e-School Armenia հեռավար ուսուցման նախագծում, Հայաստանի ֆիզիկական կուլտուրայի և սպորտի պետական ինստիտուտում: 2020 թ.-ին դիմել է «Դասավանդի’ր, Հայաստան»-ի Կայծ սոցիալական նորարարությունների ինկուբատորին՝ հիմնելով «Զարդենի»-ն՝ ջերմատան կառավարման կրթական ծրագիր, որի շնորհիվ աշակերտները ձեռք են բերում բնապահպանական և բիզնես գիտելիքներ՝ ուտելի ծաղիկներ աճեցնելու միջոցով: Այժմ Քնարան «Զարդենի» սոցիալ-կրթական հասարակական կազմակերպության ղեկավարն է:

ՎԱՐԴԱՆ ՀՈՎԱԿԻՄՅԱՆ

Նախքան «Դասավանդի’ր, Հայաստան» ծրագրին  միանալը Վարդանը սովորել է  Հայաստանի պետական մանկավարժական համալսարանում։ Ծրագրի շրջանակներում դասավանդել է մաթեմատիկա, հանրահաշիվ, երկրաչափություն, ֆիզիկա, ինֆորմատիկա։ Առաջնորդության երկամյա ծրագիրն ավարտելուց  անմիջապես հետո Վարդանը միացել է «Դասավանդի'ր, Հայաստան»-ի «Կառավարում հասարակական ոլորտում. գործընկերության ծրագրին» ՝ աջակցելով տվյալների մշակման և ներազդեցության գծով ղեկավարին։ Միաժամանակ շարունակում է դասավանդել Լոռու մարզի Ծաղկաշատ գյուղում։ 

«Գործընկերության ծրագիրն ինձ զինել է նոր գիտելիքներով ու փորձով, մասնավորապես աշակերտների և ուսուցիչների կատարողականի վերաբերյալ տվյալների հավաքագրման իրականացման առումով։  Միաժամանակ ես օգնում եմ կազմակերպությանը տվյալների հավաքագրման և վերլուծության աշխատանքներում։  Սա փոխշահավետ համագործակցություն է իմ և կազմակերպության միջև»։

ՎԵՆԵՐԱ ԱԲՈՎՅԱՆ

Նախքան «Դասավանդի’ր , Հայաստան»-ին միանալը Վեներան աշխատել է Ձորագյուղի, ապա Դիլիջանի կենտրոնական դպրոցում` որպես քիմիայի ու կենսաբանության ուսուցչուհի: 2017 - 2019 թթ առաջնորդության երկամյա ծրագրի շրջանակներում քիմիա և կենսաբանություն է դասավանդել Արագածոտնի մարզի Շամիրամ համայնքում:

«Երկամյա ծրագի ընթացքում զարգացրել եմ թիմում աշխատելու, աշխատանքս պլանավորելու, պլանավորածս ճիշտ ժամկետներում ավարտին հասցնելու հմտություններս։ Միաժամանակ ընդլայնել եմ շփումներիս շրջանակը, որն ինձ հետագայում օգնել է բազմաբնույթ խնդիրների լուծման մեջ: «Դասավանդի’ր, Հայաստանի» երկամյա առաջնորդության տարիները համարում եմ իմ կարիերայի ցատկահարթակը: Հենց այս 2 տարին ինձ զինեց անհրաժեշտ պաշարով»,- ասում է Վեներան:

Այժմ աշխատում է Լոռու մարզի Ալավերդու թիվ 10 հիմնական դպրոցում` որպես տնօրեն։ Զուգահեռ աշխատում է «Դասավանդի’ր, Հայաստան» հիմնադրամում` որպես «Կրթական ծրագրերի մշակող և համակարգող», Ներգրավված է նաև «Գիտսերունդ» ծրագրում: 2022 թվականի սեպտեմբերից Վեներայի ղեկավարած դպրոցը համալրելու է «Սերունդ» դպրոցների շարքը։

ԲԻԱՅՆԱ ԱՄԻՐՋԱՆՅԱՆ

Մինչ «Դասավանդի’ր, Հայաստան»-ին դիմելը Բիայնան սովորել է Երևանի պետական համալսարանի «Միջազգային հարաբերություններ» ֆակուլտետում։ Ավարտելուց հետո աշխատել է Ավանտա էսթետիկ բժշկության կենտրոնում` որպես ադմինիստրատոր։ Ծրագրի շրջանակներում դասավանդել է աշխարհագրություն, հասարակագիտություն և հայրենագիտություն Լոռու մարզի Կաթնառատ գյուղում։

«Առաջնորդության զարգացման երկամյա ծրագրի շնորհիվ ես համոզվեցի, որ հետևողական և հաստատակամ աշխատանքի դեպքում հնարավոր է սեփական ուժերով նախաձեռնել և հասնել փոփոխությունների՝ նույնիսկ ունենալով նվազագույն ռեսուրս», - հավաստում է Բիայնան։

Ծրագրի ավարտից հետո Բիայնան ներգրավված է եղել հանրապետության ուսուցիչների մասնագիտական զարգացման բարելավմանն ուղղված քաղաքականության մշակման ծրագրերում։ Մասնավորապես՝ ''YES'' Armenia ծրագրի շրջանակում ՀՀ ԿԳՄՍ նախարարության հետ համատեղ մշակել են «Ուսուցիչների կամավոր ատեստավորման» ծրագիրը, որը մեկնարկել է 2021 թվականի սեպտեմբեր ամսին։ Այնուհետև Ասիական զարգացման բանկի կրթական ծրագրի շրջանակում ԿԳՄՍ նախարարության հետ համատեղ մշակել են «Ուսուցիչների ստանդարտներ» և «Ուսուցիչների մասնագիտական զարգացման ուղիներ» ծրագրերը, որոնց դրույթները լրամշակվելուց հետո տեղ են գտել «Հանրակրթության մասին» օրենքի փոփոխությունների նախագծում: Հետագայում միացել է «Դասավանդի’ր Հայաստան»-ի և ՅՈւՆԻՍԵՖի հետ համատեղ իրականացվող ծրագրին՝ ուղղված ուսուցիչների կարողությունների զարգացմանը և համայնքային զարգացման նախաձեռնություններին։ Այս պահին Բիայնան զբաղվում է մարդու իրավունքների պաշտպանության ծրագրերով, մասնավորապես` հաշմանդամություն ունեցող մարդկանց իրավունքների պաշտպանությամբ և իրազեկմամբ։