Ի՞ՆՉ ԿՇԱՀԵՆ ՏՏ ԸՆԿԵՐՈՒԹՅՈՒՆՆԵՐԸ՝ ՄԻԱՆԱԼՈՎ T4A-ԻՆ

 Ի՞ՆՉ ԿՇԱՀԵՍ ԴՈՒ՝ ՈՐՊԵՍ ՏՏ ՄԱՍՆԱԳԵՏ՝ ՄԻԱՆԱԼՈՎ ՄԵՐ ԾՐԱԳՐԻՆ 

 ՀԱՃԱԽ ՏՐՎՈՂ ՀԱՐՑԵՐ

Որպես ՏՏ մասնագետ՝ ես հետաքրքրված եմ «Դասավանդի՛ր, Հայաստան»-ի Ծրագրին միանալու հարցում, և իմ ընկերությունը աջակցում է այդ գաղափարին։ Շաբաթական քանի՞ ժամ պետք է դասավանդեմ։

«Դասավանդի՛ր, Հայաստան»-ի հանդեպ իրենց պարտավորությունների շրջանակում T4A ուսուցիչ-առաջնորդներից ակնկալվում է շաբաթական 7 ժամ դասավանդել դպրոցում, ինչպես նաև 2 ժամ հատկացնել վերապատրաստման և մասնագիտական զարգացման գործընթացին։ Արտադասարանային խմբակների, ինչպես նաև դասավանդմանը նախապատրաստվելու համար Ուսուցիչ-առաջնորդները կունենան ժամանակային ճկունություն` իրենց համար առավել հարմար և արդյունավետ տարբերակով գործընթացը կազմակերպելու համար։ Այնուհետև նախաձեռնության անդամ կազմակերպություններից յուրաքանչյուրն առանձին կաշխատի Ծրագրի անդամ իրենց աշխատակիցների հետ՝ պարզելու վերջիններիս աշխատանքային և ուսուցողական պարտավորությունների հավասարակշռման լավագույն տարբերակը։

Արդյո՞ք ակնկալվում է, որ ես պետք է բնակվեմ այն համայնքում, որտեղ դասավանդում եմ։

Այո’, «Դասավանդի’ր, Հայաստան»-ի բոլոր Ուսուցիչ-առաջնորդներից ակնկալվում է բնակվել այն համայնքում, որտեղ նրանք դասավանդում են։ Մենք հավատացած ենք, որ իրապես արդյունավետորեն նորարարությունը խթանելու համար կարևոր է ապրել և աշխատել համայնքներում և լինել աշակերտների կողքին։

Արդյո՞ք անհրաժեշտ է ունենալ մանկավարժի որակավորում ծրագրին միանալու համար։

«Դասավանդի’ր, Հայաստան»-ի հագեցած ամառային վերապատրաստման ծրագրի՝ Ուսուցիչների առաջնորդության ակադեմիայի ավարտին մենք պատրաստվում ենք տրամադրել հավաստագիր, որը հնարավորություն կտա քեզ դասավանդել դպրոցում։

Ի՞նչ կարող եմ ակնկալել վերապատրաստման ամառային ծրագրից։

Սովորաբար Ուսուցիչ-առաջնորդների ակադեմիայի (որը սովորաբար անցկացվում է Ծրագրի մեկնարկին նախորդող ամռանը) տևողությունը 7 շաբաթ է, որից 3-ի ժամանակ ամբողջական ներգրավվածություն է ակնկալվում, իսկ մնացյալ մասի ընթացքում՝ օրական միջինում 4 ժամ։ T4A Ուսուցիչ-առաջնորդների դեպքում ակադեմիան կընդարձակվի մինչև 9 շաբաթ, որի միայն 1 շաբաթը կպահանջի ամբողջական ներգրավվածություն։ Այս սցենարով T4A Ուսուցիչ-առաջնորդների վերապատրաստումը կմեկնարկի «Դասավանդի՛ր, Հայաստան»-ի մյուս խմբերից 2 շաբաթ ավելի վաղ։ Կարևոր է նկատի ունենալ, որ թերի ներգրավվածություն ենթադրող շաբաթների դասախոսությունները տեղի կունենան առավոտյան ժամերին, որպեսզի T4A Ուսուցիչ-առաջնորդները կարողանան կեսօրից հետո կենտրոնանալ իրենց աշխատանքային պարտականությունների, ինչպես նաև Ծրագրին առնչվող առաջադրանքների վրա։ Ինը շաբաթական դասընթացի միայն ամբողջական ներգրավվածություն պահանջող շաբաթվա (նաև հայտնի որպես Տարածքային կողմնորոշման շաբաթ) հանդիպումներին է, որ կակնկալվի մասնակիցների ֆիզիկական մասնակցությունը․ Ուսուցիչ-առաջնորդների ակադեմիայի մնացյալ հատվածն իրականացվում է առցանց։

Որքա՞ն ժամանակ է անհրաժեշտ նախատեսել ընթացիկ վերապատրաստման համար։

Ծրագրի իրականացման առաջին տարվա ընթացքում T4A Ուսուցիչ-առաջնորդներն առցանց եղանակով կանցնեն նախապես մշակված ինքնուսուցման մոդուլներով, որոնք նվիրված են մանկավարժության, ինչպես նաև ներհամայնքային նորարարության թեմաներին։ Յուրաքանչյուր մոդուլ բաղկացած է 25 րոպե տևողությամբ տեսանյութից և մի շարք առաջադրանքներից, որոնց համար կպահանջվի շուրջ 2 ժամ։ Յուրաքանչյուր ամիս Ուսուցիչ-առաջնորդները կստանան 2 մոդուլ մանկավարժական և 1 մոդուլ համայնքային նորարարության թեմաներով։ Ի հավելումն ինքնուսուցման մոդուլների` Ուսուցիչ-առաջնորդները տարվա ընթացքում չորս անգամ կմասնակցեն տարածաշրջանային կամ ազգային հավաքների, որոնք սովորաբար տեղի են ունենում արձակուրդներին կամ շաբաթ-կիրակի օրերին։

Ի՞նչ արտադասարանական խմբակներ կարող եմ կազմակերպել։

Մենք խրախուսում ենք քեզ և մյուս T4A Ուսուցիչ-առաջնորդներին ստեղծել  հնարավորություններ, որոնք աշակերտներին կկապեն այն գործունեությանը, որ դու իրականացնում ես քո աշխատավայրում։ Այսպես, եթե ծրագրավորող ես, դու կարող ես դասերից հետո կազմակերպել ծրագրավորման դասընթացներ աշակերտների համար։ Բացի այդ, «Դասավանդի՛ր, Հայաստան»-ի Ուսուցիչ-առաջնորդներին խրախուսում ենք Փոփոխության հենքով ուսումնառության միջոցով աջակցել իրենց աշակերտներին ՏՏ ուղղվածությամբ և աշակերտական առաջնորդությամբ նորարարական ծրագրերի իրականացման հարցում։

Արդյո՞ք կարող եմ դիմել «Դասավանդի՛ր, Հայաստան»-ին իմ նախագծերը ֆինանսավորելու համար։

Ծրագրին քո մասնակցության առաջին տարվա ընթացքում դու հնարավորություն կունենաս դիմելու «Դասավանդի’ր, Հայաստան»-ի միկրոդրամաշնորհներին (օրինակ, 200.000 դրամի շրջանակում)` իրականացնելու փոքրածավալ, աշակերտական առաջնորդությամբ կազմակերպվող նորարարական ծրագիր։ Երկրորդ տարվա ընթացքում դու կարող ես ընդարձակել նախագիծը՝ դիմելով «Դասավանդի’ր, Հայաստան»-ի Համայնքային նորարարության հիմնադրամին մինչև 1,000 ԱՄՆ դոլարի ֆինանսավորում ստանալու ակնկալիքով։ Ծրագիրն ավարտելուց և Շրջանավարտ-դեսպան դառնալուց հետո դու կարող ես ներգրավվել «Կայծ» Սոցիալական նորարարության ինկուբատորում և քո նախագծի համար ստանալ մինչև 10,000 ԱՄՆ դոլարին համարժեք սկզբնական ֆինանսավորում։

_______________________________

Ես արդեն ավարտել եմ Ուսուցիչ-առաջնորդների երկամյա ծրագիրն ու ցանկանում եմ ծրագրավորում սովորել։ Ինչպե՞ս կարող եմ մասնակցել Armenian Code Academy-ի դասընթացներին։

Խնդրում ենք կապ հաստատել հետևյալ էլեկտրոնային հասցեով՝
alumni@teachforarmenia.org.